A Xunta doa carne certificada ao hospital de Ferrol

Seguindo coas doazóns realizadas aos centros sanitarios a través da rede Mercaproximidade, a Consellería do Medio Rural entregou este xoves varias pezas de carne de Ternera Gallega ao Complexo Hospitalario Universitario de Ferrol. Unha partida de produtos que tamén incluíu queixos galegos e que se suma a outras achegas realizadas a entidades e comedores sociais.

Dentro desta iniciativa, recibiron alimentos de orixe galega o Complexo Hospitalario de Santiago, o CHUAC da Coruña, os hospitais de Ourense e Lugo e os centros de Monforte e A Mariña. Produtos agrogandeiros que a Xunta tamén doou ao Banco de Alimentos de Lugo e que supuxo a entrega de 100 toneladas de patacas nas sedes de Cáritas de toda España. 

Unión de provedores e distribución 

A Xunta adquire os produtos para estas doazóns desde a plataforma de Mercaproximidade, impulsada por Medio Rural para dar aos gandeiros e agricultores unha nova vía de comercialización ante o peche da hostalaría. Forman parte desta rede 450 industrias e produtores e colaboran a maioría das cadeas de distribución que operan en Galicia.