Gadis segue ampliando a formación das súas carniceiras e carniceiros con Ternera Gallega

Continúa o programa formativo da IXP con profesionais de carnizaría da cadea Gadis. Nesta ocasión, achegáronse á sede do Consello Regulador dous grupos de 15 persoas cada un; que, na liña habitual, participaron nun seminario teórico e práctico sobre a carne certificada, o seu sistema de control e rastrexabilidade e os aspectos organolépticos e culinarios que a definen.

Cortes como o peito, o vacío, a tapa da pa ou a bavette foron os máis destacados da sesión gastronómica, na que o cociñeiro José Manuel Mallón explicou as mellores técnicas de corte, tratamento e preparación segundo as pezas; lembrando que non existen as de primeira ou segunda categoría, senón, pezas e usos culinarios. Deste xeito, os participantes puideron comprobar a versatilidade do produto amparado e as receitas ou tipos de cociñado máis axeitados para cada corte, desde pratos rápidos e sinxelos e outros con horas de asado ao forno. 

Previamente, o director de Promoción da IXP, Luiz Vázquez, e o responsable de Puntos de Venda, José Manuel Ons, abordaron diferentes cuestións sobre o funcionamento do selo de calidade e do seu programa de control, desde as gandarías aos establecementos, pasando polas industrias.