O Consello Regulador ofreceu dúas demostracións de cociña en Salimat

As carnes de Ternera Gallega Suprema e de Ternera Gallega conformaron o menú dos dous showcookings que a IXP presentou no Salón de Alimentación do Atlántico, celebrado entre o xoves e o domingo en Silleda, dentro da Semana Verde de Galicia. Medio centenar de persoas puideron degustar tres receitas diferentes, ademais de afondar nas cualidades diferenciais das carnes amparadas e nos valores detrás do selo IXP.

Con Marcos Arufe como cociñeiro, as demostracións gastronómicas comezaron cun prato en cru, para o que empregou o corte redondo (babilla). Con esta peza, presentou unha parisa, unha elaboración similar ao tartar, típica de Texas, que se prepara con zume de limón e queixo. Acompañouna con chips de Pataca de Galicia.

Para amosar os sabores e a moleza da carne certificada, cociñándoa simplemente á prancha sen máis artificios, o chef escolleu a tapa da pa (llana). Este corte deu pé a explicar ao público a versatilidade das diferentes pezas do vacún e que o tratamento axeitado para cada unha permite obter grandes resultados gastronómicos. 

Como prato final, Arufe serviu unha tapa do peito ou brisket, guisado ao vacío (sous vide) e acompañado de Castaña de Galicia IXP. Nas dúas demostracións culinarias os pratos acompañáronse dos selos de calidade Pan Galego e Pan de Cea.

Características únicas

As explicacións gastronómicas intercaláronse con información sobre a IXP, o tipo de ganderías inscritas e os animais e razas amparados, ademais de sobre as diferentes categorías comerciais da carne certificada. O director de Promoción do Consello Regulador, Luis Vázquez, abordou tamén o programa de control e rastrexabilidade e incidiu na diferenciación das etiquetas que acompañan o produto.