A figura do veterinario e o plan de sanidade integral serán voluntarios

A proposta do Ministerio de Agricultura, Pesca e Alimentación, o Consello de Ministros aprobou os reais decretos sobre sanidade animal que establecen as obrigas de vixilancia dos titulares das explotacións gandeiras e que fixan a voluntariedade de dispoñer dun veterinario, dun plan sanitario integral e dun plan de benestar animal. 

Estes requisitos, que en principio ían ter carácter obrigatorio, pasan a ser voluntarios tralas negociacións entre o goberno central e as organizacións agrarias UPA e Unión de Unións co obxectivo de flexibilizar a actividade e restar carga burocrática ao sector. 

O novo real decreto que desenvolve a normativa da UE asigna aos titulares das ganderías unha serie de responsabilidades en cuestións como a bioseguridade, o uso prudente e responsable dos medicamentos veterinarios e a prevención e control de enfermidades.

As explotacións deberán recibir visitas zoosanitarias por parte dun profesional veterinario cunha frecuencia baseada no risco que presente dita gandería. Estas visitas incluirán a supervisión de aspectos sanitarios, recomendacións para arranxar deficiencias, a redución do uso de antibióticos e a detección de signos clínicos indicativos de enfermidades. As ganderías que, voluntariamente, conten cun veterinario de explotación serán consideradas de menor risco sanitario. 

Aínda que se elimina a obriga de ter un plan de sanidade integral, mantense o compromiso cun alto estatus sanitario da cabana gandeira a través dunha serie de requisitos que deberán ser avaliados nas visitas zoosanitarias.