Ternera Gallega imparte unha masterclass para profesionais na comarca do Salnés

A IXP segue achegando os cortes alternativos da carne certificada ao sector da restauración e da canle Horeca. Nesta ocasión, faino a través dun obradoiro de cociña que se impartirá esta tarde no Cash Record de Sanxenxo, da man do chef de Ternera Gallega, Xosé Manuel Mallón, e do director de promoción da IXP, Luis Antonio Vázquez. Exporán ata 10 pezas diferentes, das menos coñecidas do canal, para amosarlles aos profesionais do sector a súa versatilidade gastronómica, á altura dos cortes máis habituais.

Trátase de pezas mal denominadas “de segunda”, pero que ofrecen infinitas posibilidades culinarias e gran calidade organoléptica. E implican, ademais, unha rendibilidade económica, posto que estes cortes alternativos presentan prezos máis axustados que outros de maior tirón comercial, como o lombo ou o solombo.

Precisamente, para demostrar unha boa xestión económica e culinaria da carne amparada, os dous expertos da IXP exhibirán receitas moi variadas: preparacións rápidas e sinxelas á prancha e guisos ou asados máis traballados. Múltiples opcións que buscan que os profesionais da restauración e da canle Horeca incorporen novas ideas e amplíen a súa oferta gastronómica, sacando o máximo partido ás cualidades de cada peza.

Cortes alternativos en receitas ilimitadas

Para os entrantes, Ternera Gallega proporá, nesta masterclass, pezas como a folla branda ou lonxa (tapa) e o redondo, coas que elaborar pratos da cociña máis vangardista a través de tatakis e carpaccios. A folla branda tamén se vai empregar noutras receitas destinadas á prancha, ademais do filete de vacío, a bavette e a febra miúda (culata de contra); que, co correcto tratamento, dan lugar a unha carne tan tenra e saborosa como as pezas de primeira. Estas propostas irán acompañadas de distintas guarnicións para darlle un toque diferente a cada prato.

E para os guisos ou asados, a IXP vai traballar coa folla dura (contra), a febra miúda e o costelar. Cortes cos que suxire diversas preparacións: desde un renovado sándwich club ata unha tradicional carne ao caldeiro, pasando por un xeito alternativo de tratar a faldra, presentada como costela glasada.