A Escola de cociña de Ternera Gallega trae novas receitas

A segunda tempada da Escola de cociña segue ofrecendo propostas gastronómicas inéditas na canle de Youtube da IXP, co obxectivo de que os consumidores saquen o máximo partido ás diferentes pezas da carne certificada. Da man do chef de Grupo Nove, Javier Rodríguez “Taky”, a Indicación Xeográfica Protexida ensina a coñecer mellor o produto e os seus cortes para potenciar o seu sabor e a súa versatilidade na cociña.   

Pensando no Nadal, estréase este Asado de Ternera Gallega con mostaza e herbas; pero aproveitando os produtos de tempada, a IXP proponnos tamén esta Picaña con Queixo do Cebreiro e cabaza. Para Noitevella, opta por un prato máis desenfadado e orixinal, como un Carpaccio de redondo con abelás de queixo San Simón da Costa.

A Escola de Cociña de Ternera Gallega presenta tanto pratos sinxelos para o día a día cociñados á prancha ou á grella, sempre cun toque orixinal, como asados ou guisos máis elaborados, ideais para compartir coa familia e os amigos. A IXP tamén ofrece novas videorreceitas para os que buscan opcións healthy e para quen queira render as súas preparacións de cara a unha cociña de aproveitamento. 

Como receita rápida e diferente, Ternera Gallega suxire estas Piruletas de bavette, elaboradas cunha peza menos habitual das que se soen usar na grella. Tamén se prepara de forma moi fácil esta Ensalada de Ternera Gallega ao estilo thai, na que o segredo está no aliño para lograr un prato moi rico e saudable.

Nas vindeiras semanas, a Escola de Cociña de Ternera Gallega seguirá publicando as súas novas propostas culinarias, con receitas como un Goulash ou unha Tapa da pa con ñoqui á crema. 

Cada corte, o seu uso culinario

Como complemento ás receitas, a Escola de Cociña aporta novo contido didáctico sobre todas as pezas do vacún e o seus mellores usos. Así, os consumidores poden coñecer os nomes dos diferentes cortes, a súa forma e a súas características organolépticas, ademais de como preparalas e limpalas. 

O chef Taky ensina a recoñecer as pezas do vacún e que receita ou estilo de cociñado é o máis axeitado para cada unha delas. Ademais de repasar os cortes clásicos e máis habituais na nosa cociña, como o lombo ou a croca; tamén descubre outras pezas menos coñecidas, nas que a técnica de corte e a preparación son fundamentais para saborear a súa moleza e os seus zumes, como é o caso do vacío, a bavette, a tapa da pa ou o peito.