A versatilidade gastronómica das carnes do vacún galego exhíbese en Xantar

As IXP Ternera Gallega e Vaca Galega / Boi Galego impartiron este domingo en Xantar dúas masterclass sobre as pezas singulares das carnes amparadas e as infinitas posibilidades gastronómicas que ofrecen. Ante 40 asistentes, ambas Indicacións Xeográficas Protexidas presentaron cortes pouco habituais, fóra dos máis coñecidos e socorridos no vacún, para amosar diferentes receitas e reinventar as propostas culinarias en torno á carne.

Baixo o título “Novos cortes de Ternera Gallega para unha cociña saudable e divertida”, o chef Javier Rodríguez Ponte “Taky” propuxo ideas sinxelas pero axeitadas para unha alimentación equilibrada, como unhas Piruletas de Ternera Gallega con mollo verde, elaboradas cunha peza singular como é a bavette. Tamén presentou unhas Lascas de lombo baixo ao natural con allo confeitado e zume trufado da carne. 

Como ideas moi apetecibles para esta época do ano, Taky adentrou aos asistentes nas posibilidades do tradicional rosbif, que el suxire preparar con pezas variadas, como o lombo baixo, o corte redondo (babilla) ou o redondo. Para este prato, o chef xoga con diferentes técnicas de cociñado; nesta ocasión, optou por un macerado en salmoira que aportou zumes á carne. 

O vacún maior e os seus usos gastronómicos

Na masterclass dedicada á carne certificada pola IXP Vaca Galega / Boi Galego, o cociñeiro do Restaurante España, Héctor López, presentou cortes alternativos do vacún maior, fóra do habitual chuletón, para demostrar que son pezas igual de interesantes en textura, moleza e sabor. 

Cunha agulla de Boi Galego, que asou durante toda a noite previa ao obradoiro, elaborou unha divertida fajita con chips de cenoria, coandro e cebola. Pero tamén quixo amosar todas as opcións que ofrece a carne de Vaca Galega, polo que preparou tres cortes diferentes. A tapa da pa e a bavette foron os escollidos para degustar simplemente á grella, evidenciando as cualidades da carne sen ningún artificio. E como prato máis especial, elixiu un filete de vacío para elaborar unha Vaca Galega rossini, con carpaccio de boletus e puré de pataca.

O Xantar do reencontro

A 22ª edición desta feira, con 160 expositores e máis de 100 actividades, recibiu 18.000 visitas. Unha boa asistencia para un Xantar de transición, que supuxo o reencontro dos profesionais do turismo e da hostalaría tralas restricións derivadas da pandemia. O primeiro Salón celebrado en outono, pero non o último. Segundo a organización, despois de falar cos expositores, o cambio de data da feira vaise manter, anunciando xa a edición do 2022 para entre o 9 e o 13 de novembro, coincidindo co San Martiño.