Gandería e industria cárnica, servizos esenciais

Os sectores gandeiro e cárnico, como parte da cadea alimentaria, continúan coa súa actividade posto que son servizos fundamentais nestes momentos. Tras decretar o Goberno central o cese dos traballos non esencias a partir de hoxe, o BOE publicado esta noite especifica que se manteñen as labores da gandería, da agricultura, da acuicultura, da pesca e da industria alimentaria, ademais das actividades necesarias para garantir o seu funcionamento. 

Así, continúan traballando as empresas que participan na cadea de abastecemento e na produción de produtos de primeira necesidade, como alimentos, bebidas e alimentación animal, ademais das implicadas na súa distribución desde a orixe ata o destino final. Tamén seguen funcionando as actividades que ofrecen subministros, equipos ou materiais necesarios para o funcionamento dos servizos esencias.  

Igualmente, continúan os servizos de transporte, tanto de persoas como de mercadorías, necesarios para estas actividades, os servizos de xestión de residuos e os de atención sanitaria a animais. 

Deste xeito, e como xa se garantira ao decretar o estado de alarma, as autoridades aseguran o abastecemento a tódolos cidadáns, a pesar das novas medidas de limitación de movementos para conter o avance do coronavirus.